САУ БАРÆГ

Тар хъæдты бардуаг, цæры сау хъæды лæгæты. Бады сау бæхыл, дары сау дарæс æмæ сау хæцæнгæрзтæ. У ма сау хъуыддæгтæ кæнæг дæр — абырджыты, тыхгæнджыты бардуаг дæр. Ардауы сæ цуанæттыл, хъæддзæуттыл, æмæ уыдон сæ размæ бабадынц, байсынц сын сæ фæллой. Сæхи дæр ууыл фæдзæхсынц. Æмæ сæ къухы куы ницы бафты, уæд æй Сау барæджы аххос фæкæнынц.

Раджы, тынг раджы Тырсыгомы цард иу фыдгæнæг абырæг Лоло. Хуыцау ыл рахатт, йæхи дыууæ æфсымæры дæр кæй амардта, уый тыххæй. Иуахæмы Лоло йæхи бафæдзæхста Сау барæгыл æмæ та йæхи хуызæн дыууæ фыдгæнæгимæ адæмæн батых кæнынмæ æрхызт Мнайы цъитийы сæрты. Йæ цæст æрхæцыд рæсугъд чызг Хорæйыл. Уый йæ фыды сæрдыгон фосдарæнмæ æдасæй, уæндонæй фæцæйцыд хохаг тæссаг фæндагыл, фосæн дон бадарынмæ.

Сабыр уыдис комы. Мигътæ уæззаугай лæсыдысты хæхты уырынгтæ риутыл, Мнайы сæрыл та бадт урс æврагъ. Лоло фæйнæрдæм афæлгæстытæ кодта. Сау айнæджы рындзыл сау бæхыл, сау хæстон дзаумæтты, тары æмбæхстæй лæууыд Сау барæг æмæ Лолойæн йæ къухæй амоны чызджы 'рдæм. Лоло йæхи чызгыл рауагъта. Аскъæфта йæ æмæ куыддæр цъитийы рæбыны сæлæф митмæ бахæццæ, афтæ мигътæ фæйнæрдæм фæлыгъдысты, Мнайы сæр урс æврагъ атад, æмæ Лоло сагъдауæй аззад. Хохы цъуппыл æнусон цъитийыл æнцад-æнцойæ лæууыд арвы дзаг Урс барæг. Урс бæхыл, цæхæртæ калгæ уæлæдарæсы. Йæ цæсгом — мæсты хуыз. Лоло базыдта Уастырджийы, мæгуырты сæрыл æмæ рæстыл тохгæнæг, фыдгæнджыты æфхæрæг Уастырджийы.

Сау барæг дæр фырадæргæй фæстæмæ фæцудыдта æмæ æд бæх сæрсæфæн рындзæй атахт. Йæ уынæр зæй расайдта, æмæ йæ хъæлæсы абырджыты ахаста.

Бæстæ куы æрсабыр, уæд та æврæгътæ пирæнгæйттæй зилæнтæ систой хæхты риутыл, Мнайы цъуппытыл. Дæлейау зæйы сæрыл иунæгæй тарст æмæ æргъæвстæй лæууыд Хорæ дæр.

кæс «АРВЫ ДУАР»-Ы СÆРГÆНДТÆ